25.06.2009 USAID და მიწის მესაკუთრეთა უფლებების დაცვის ასოციაცია ხელს უწყობენ იძულებით გადაადგილებულ პირთა საკუთრების უფლებების რეგისტრაციას

გორი  – 2009 წლის 24 ივნისს მიწის მესაკუთრეთა უფლებების დაცვის ასოციაციამ და აშშ საერთაშორისო განვითარების სააგენტომ (USAID) უმასპინძლეს იძულებით გადაადგილებულ პირთა უძრავი ქონების რეგისტრაციის საკონსულტაციო ცენტრის პრეზენტაციას.

საკონსულტაციო ცენტრი მუშაობს იმ მოსახლეობის მიწასთან და სხვა უძრავ ქონებასთან დაკავშირებული პრობლემების მოგვარებაზე, რომლებზედაც გავლენა მოახდინა 2008 წლის აგვისტოს რუსეთ-საქართველოს კონფლიქტმა. ცენტრი ქმნის სამხრეთ ოსეთის ადმინისტრაციულ საზღვრებში არსებული და გასულ ზაფხულს აგვისტოს მოვლენების შედეგად მიტოვებული უძრავი ქონების მონაცემთა ბაზას, რათა აღდგენილი იქნეს ქურთისა და ერედვის სარეგისტრაციო სამსახურების განადგურების შედეგად დაკარგული სარეგისტრაციო მონაცემები. ცენტრი ეხმარება იძულებით გადაადგილებულ პირებს მათ მიერ მიტოვებული სახლებისა და მიწის ნაკვეთების სატელიტურ ორთოფოტოებზე იდენტიფიცირებაში, ამ ქონებაზე საკუთრების უფლებების დადასტურებასა და მიწის ნაკვეთების/შენობების საჯარო რეესტრის ერთიან მონაცემთა ბაზაში დარეგისტრირებაში.

გარდა ამისა, საკონსულტაციო ცენტრის პერსონალი ამჟამად აწარმოებს საკადასტრო სამუშაოებს საქართველოს მთავრობის მიერ იძულებით გადაადგილებული პირებისთვის გადაცემულ სახლებსა  და საკარმიდამო და სასოფლო-სამეურნეო მიწის ნაკვეთებზე, რათა შესაძლებელი გახდეს ამ ქონების კერძო საკუთრებაში გადაცემა.

საკონსულტაციო ცენტრის საქმიანობას აფინანსებს USAID, აშშ-ის მთავრობის მიერ საქართველოს ხალხისათვის გამოყოფილი 1-მილიარდი დოლარის დახმარების ფარგლებში. ცენტრის საქმიანობას წარმართავს  მიწის მესაკუთრეთა უფლებების დაცვის ასოციაცია, რომელსაც აქვს USAID-თან თანამშრომლობის მრავალწლიანი გამოცდილება.

აღსანიშნავია, რომ USAID-ის დაფინასებით და მიწის მესაკუთრეთა უფლებების დაცვის ასოციაციის ტექნიკური დახმარებით საქართველოს მთავრობის მიერ იძულებით გადაადგილებულ პირთათვის გადაცემული სახლები და საკარმიდამო და სასოფლო-სამეურნეო მიწის ნაკვეთები კერძო საკუთრებაში უკვე დაურეგისტრირდა 1172 ოჯახს, მიმდინარე თვეში საკუთრების უფლებები დაურეგისტრირდება 1088 ოჯახს, ხოლო  წლის ბოლომდე - კიდევ 4207 ოჯახს.   

ღონისძიებაში მონაწილეობა მიიღეს USAID-ის კავკასიის მისიის მოქმედმა დირექტორმა იოაკიმ პარკერმა, მიწის მესაკუთრეთა უფლებების დაცვის ასოციაციის დირექტორმა დავით გიორგაძემ, შიდა ქართლის გუბერნატორის მოადგილემ ზურაბ ჩინჩილაკაშვილმა, იუსტიციის მინისტრის მოადგილემ ჯაბა ებანოიძემ,   ლტოლვილთა და განსახლების მინისტრის მოადგილემ ბექა თორიამ, საჯარო რეესტრის ეროვნული სააგენტოს თავმჯდომარემ სერგო წიქარიშვილმა, ადგილობრიივი ხელისუფლების წარმომადგენლებმა და პროექტის ბენეფიციარებმა, რომელთაც დადებითად შეაფასეს ცენტრის მიერ განხორციელებული საქმიანობა და აღნიშნეს ცენტრის საქმიანობის შედეგების განსაკუთრებული მნიშვნელობა.